Masarap. Masustansya. At matipid. Ang tatlong "M" na iyan ang dapat na isasaalang-alang sa paghahanda ng mga pagkain. May mga masasarap na pagkain na hindi gaanong nagbibigay ng sustansya sa ating katawan. At hindi naman ang lahat lamang ng mga mamahalin na pagkain ang masustansya at masarap. Hindi rin madadaan sa dami ng sahog ang pagpapasarap sa ano mang putahe. Sa aklat na ito, ay sinikap naming matipon ang tatlong 'M' na iyan sa mga pagkain. Mga putaheng isa-isang sinubok namin upang di naman kami mapahiya sa inyo. Mga paraan ng pagluluto sa simpleng mga pangungusap upang madaling mauunawaan at masundan ng kahit na mga batang bago pa lamang natututong bumasa. Binanggit namin ang mga bata, sapagka't naniniwala kami na lalong mainam na bata pa lamang ay matuto nang magluto. Bibigyan din namin kayo, sa aklat na ito, ng mga "tips" sa maayos na paghahain sa mesa. Iyan ay upang maakit kaagad ang panggana ng inyong mga hahainan. Matutunghayan din ninyo dito ang mga "tips" ukol sa madali at maayos na paglilinis ng mga isda, paghihiwa ng mga gulay at panahog, at wastong paghahanda ng mga lulutuin nang di lubhang mababawasan ang sustansya ng mga ito. --Mula sa Paunang-Salita ni Aling Charing - from Amzon